Sahararen aldeko XX. Euskal Karabana

Tindoufen bizi diren saharar iheslarientzako elikagai-ekarpena osatzea da karabana horren asmoa, larrialdiko laguntza bidalita. Horretarako, herri-bilketa aurreikusi zuten Euskadin, bai elikagaiena (arroza, atuna eta sardinak oliotan, azukrea, pasta eta lekaleak), bai eta emakumeentzako higiene-produktuena ere (konpresak); eta bestetik, erakunde publikoek (batez ere, udalek) egindako ekarpenari esker, bigarren eskuko kamioiak erosi ziren, gai horiek guztiak hara eramateko, eta, gero, kamioiak dohaintzan emateko. Elikagaiak banatzeaz arduratzen den erakundea Saharako Ilargi Gorria da. Tindoufera eraman ondoren, gauza horiek guztiak tokiko garraiolariek banatuko dituzte, eta saharar gidariekin batera, wilaya eta zentro komunitarioetan utziko dituzte.
XX. karabana Donostiatik abiatu zen, eta hainbat trailerrek osatu zuten. Trailer horietan erakunde publiko eta pribatuen eta herritarren diru-ekarpenei esker lortutako laguntza humanitarioa eraman zuten. Hamaika pertsonak eskuzabaltasunez lagundu zuten, halaber, beren borondatez eta era guztiz altruista batez, laguntza humanitario hori biltzeko eta kargatzeko lanetan parte hartuz.