Palestinan, urriko erasoaldiak jotako Gazako biztanleentzako elikagai-laguntza, genero-ikuspegian oinarrituta

Egun indarrean dagoen erasoaldia 2023ko urriaren 7an hasiz geroztik, UNRWAk, gutxi gorabehera, 695.000 pertsonari laguntzen die une honetan, 149 babeslekutan. Bi milioi pertsona baino gehiago daude ur, elikagai, ospitaleetako sorgailuetarako erregai eta abarren gabezia pairatzen, eta, ondorioz, beharrak izugarriak eta etsigarriak dira, kontuan hartuta, gainera, erasoaldia hasi zenetik, laguntza humanitarioa sartzeko modua oso mugatua dela. Azaroaren 3an eta 4an, hornidura humanitarioa garraiatzen zuten 77 kamioi (hornidura medikoak, elikagaiak eta edateko uraz beterik), sartu ziren Gazako Zerrendara Rafah-ko igarobidetik; ordurako, guztira 451 kamioi sartu ziren zerrendara. Azaroaren 3an eta 4an sartu ziren kamioietako hamabi UNRWAren kamioiak ziren. UNRWAko taldeek konboiak jaso zituzten Gazan, eta hornigaiak biltegiratzen eta banatzen lagundu zuten, NBEko beste agentzia batzuekin lankidetzan. Nolanahi ere, azaldutakoa tanta bat da ozeanoan, Gazan harrapatuta dauden bi milioi pertsona baino gehiagoren behar ikaragarriak aintzat hartuta. Ia hilabete batean, ez da erregairik iritsi, eta horrek eragin biziki hondagarria izan du ospitaleetan, okindegietan, ur-azpiegituretan eta UNRWAren esku-hartzeetan.
Horregatik guztiagatik, UNRWAk premiazko deia egin du datozen 90 egunetarako beharren kalkuluei erantzuteko. Elikagaiak eta ura erosteko, 36 milioi euro beharko lirateke, eta deialdian aipatu diren beste behar batzuk honako hauek dira:
- Elikagaiak ez diren artikuluak.
- UNRWAren babeslekuen mantentze-lanak.
- Lehen mailako osasun-arreta UNRWAren babeslekuetan.
- Larrialdiko erantzunean, premia bereziak dituzten pertsonak kontuan hartzea.
- Logistika eta komunikazioak.