Landa eremuan baratze ekologikoak sortzea genero berdintasunerako

Proiektua Potosí Departamenduko Ckochas Udalerriko 5 komunitatetan (Ckochas, Chejchi, Seocochi, Mellena alta eta Keluyo) garatuko da. Udalerrian 15.812 lagun bizi dira, jatorriz kitxuak, eta % 49,65 emakumeak dira. Emakumeen aurkako indarkeriaren egoerak oso datu latzak eskaintzen ditu Bolivian. 2014an erregistratutako kasuak % 50ean handitu ziren zifrak argitara ematea ahalbidetu zuen lege bat onartu zelako, eta, harrez gero, batez beste, ehuneko hori beste % 10ean emendatu da urterik urte. Indarkeria ekintzak emakumeen aurkako diskriminazioa nagusitzen den testuinguruan gertatzen dira, familia, komunitate eta erakunde mailan, eta egoera hori larriagoa da landa eremuetan, hala nola esku hartzeko eremuan, salaketetatik eratorritako lege prozesuak atzeratzen direlako, herritarren ezagutza maila eskasa delako indarkeria matxistaren aurrean jarduteko, eta Udal Lege Zerbitzu Integralen (SLIM) gaitasuna ere eskasa delako eta behar bezala gaituta ez dagoelako egoera horretan dauden emakumeei laguntzeko. Kultura patriarkala, gurasoek etxe barruan haurrekiko eta nerabeekiko dituzten indarkeriazko jokabideak, gizonezko irakasleek eta ikasleek indarkeria fisikoa, psikologikoa eta sexuala erabiltzea hezkuntza unitateetan, emakumeen erakundeek gizartean eta politikan duten eragin txikia eta Udal Gobernua genero indarkeriak dakarren arazoaren garrantziaren aurrean itsuarena egitea dira genero indarkeria eragiten duten arazoen atzean dauden beste faktore batzuk. Horregatik guztiagatik, proiektuaren helburua da genero indarkeriarik gabeko bizimodua izateko eskubidearen erabilera sustatzea heziketa inklusiboa indartuz.