Aita Mari. Laguntza humanitarioa eta larrialdi egoeran dauden txalupen erreskatea

Proiektuaren esparrua Erdialdeko Mediterraneoa da, Italia, Tunisia eta Libiako kostaldeen artean dauden nazioarteko itsas eremua. Europako kostaldeetara iristeko bideen artean, Erdialdeko Mediterraneokoa da arriskutsuenetakoa. 2022an, Mediterraneoan hil edo desagertu ziren 2.257 lagunetatik 1.368 bide hori egiten ari ziren: eta 2023ko lehen hilabeteetan ia 300 izan ziren biktimak, horien artean adingabeak. Hilabeteak edo urteak ematen dituzten bidean, asko eta asko bahitu egite dituzte, esplotatu, estortsioa eta esklabotasuna nozitzen dituzte; beste batzuk, Libian, legez kanpoko atxilotze zentroetan edukitzen dituzte giza baldintza ezin okerragoetan, eta bestetzuk basamortuan hiltzen dira. Emakume eta neskatxa errefuxiatu eta migratzaileen aurkako indarkeria bide osoan barrena dago hedatuta. Gainera, erreskatatzen diren gehien-gehienek Egipton, Tunisian, Bangladeshen, Sirian, Afganistanen, Boli Kostan, Ginean, Pakistanen, Iranen eta Eritrean dute jatorria, eta herrialde horietan giza eskubideen aurkako urraketa larriak egiten dira. Hala bada, itsasoan hiltzeko edo desagertzeko arriskua gainditzen lortzen dutenak beren osasun integrala (fisikoa, psikologikoa, emozionala, etab.) kaltetzen duten askotariko eraginekin iristen dira lehorrera. Beraz, proiektuaren helburua da itsasoko salbamendu gaian nazioarteko legedia betearazten laguntzea Mediterraneoan dabiltzan migratzaileak eta errefuxiatuak bilatzeko eta erreskatatzeko operazio koordinatuak eginez.