Elikagai laguntza, oinarrizko osasun laguntza eta laguntza psikosoziala qasrok eta kalak chyah-n errefuxiatutako kurduentzat

Proiektua Qasrok eta Kalak Chyah-ko komunitateetan garatuko da, Irakeko Ninive eskualdean.
UNHCR-ren arabera, Siriako gatazka seigarren urtean sartzear dagoela, 4,7 milioiko pertsona errefuxiatu bihurtu dira, etxeak laga dituzte eta babes segurua bilatu dute ondoko herrialdeetan, hots, Libano, Jordania, Irak, Turkia eta Egipton. Leku horietan bizi baldintza gogorrak jasaten ari dira, eta okerrera egiten ari dira, gatazkarentzako irtenbiderik ikusten ez dela, gainera, epe laburrean.
Proiektu honen xede den biztanleria Siriatik heldutako etnia kurduko komunitatekoa da, Irak iparraldeko lurralde kurdura iritsi eta goian aipatutako komunitateen inguruan finkatu baitzen. 190 familia inguruko populazioa da (950 pertsona) eta, errefuxiatuen esparruetan kokatutako biztanleria ez izaki, zailtasun handiagoak dauzka laguntza humanitarioa jaso ahal izateko.
Horregatik proiektuaren asmoa da pertsona horiei elikagai laguntza, oinarrizko osasun laguntza eta laguntza psikosoziala ematea. Ildo horretatik, ondoko jarduera hauek aurreikusten dira:
1. Elikagaiak eta erregaiak erostea eta banatzea. Horretarako, familia onuradunekin koordinaturik, banatu beharreko elikagai-kitean egon beharko duten oinarrizko elikagaiak definituko dira, elikagai horiek eta erregaia erosi eta kitak banatuko dira.
2. Lehen mailako mediku arreta eta medikamentu hornidura. Horretarako, proiektuko lantalde medikoak, mediku batez eta erizain batez osatuak, mediku-kontsultak egingo ditu, egunero, Qasrok-eko udalak lagatako instalazioetan, proiektuaren esparruan erosiko den osasun klinika mugikorraren bitartez. Gainera, proiektuko lantalde medikoak 30 pertsonako boluntario talde bat prestatuko du, osasun praktika egokiak sustatzeko.
3. Laguntza psikosoziala eta aisialdiaren kudeaketa. Hiru pertsonako lantalde batek (bi psikologo eta gizarte langile bat) laguntza psikosoziala emango du, aisiako jarduerak antolatuko ditu adin taldeen arabera, eta 30 boluntarioko talde bat prestatuko du terapeuta komunitario gisa beste lan batzuetan aritu daitezen.