Black Friday Bidezko Merkataritzaren aldeko kanpaina

Azaroan, Black Friday eguna ospatzearekin batera, eta bi astetan zehar, “Bidezko Merkataritzak on egiten dio mundu guztiari” izeneko kanpaina antolatu zen bidezko merkataritzari buruzko Bilbobusetako berinapen edo markesinen panel digitaletan. Bidezko Merkataritzako Estatuko Koordinakundeak taxutu zuen kanpaina, diseinua eta hizkuntza udal euskarrietara egokituz. Bidezko Merkataritzako Estatuko Koordinakundea Espainiako plataforma da, eta Bidezko Merkataritzan lan egiten duten 30 erakunde biltzen ditu. Plataforma horren helburua ekonomia solidarioaren sektore hori indartzea da, planetan pobretutako komunitateak garatzen laguntzen baitu.
Kanpainaren helburua Bilboko herritarrak bidezko merkataritzari buruz sentsibilizatzea izan zen, kontsumismoaren funtsezko data batean, hau da, Black Friday delako egunean. Horretarako, Green Friday egun alternatiboa ospatu zen, alde batetik, kontsumo kontzienteagoa bultzatzeko eta, bestetik, kontsumo-jarraibideak produktu jasangarriagoetarantz bideratzeko, ingurumenari, gizarteari eta etikari dagokienez.