Biosortzailea: gizartea eraldatzeko narratiba berriak

Proiektua Gipuzkoako hainbat lekutan garatuko da: Errenteria, Tolosa, Zumaia eta Euskal Kostaldeko Geoparkearen testuingurua. Nazio Batuek eta komunitate zientifikoak urteak daramatzate klima aldaketari eta biodibertsitatearen eta giza eskubideen errespetuan dituen ondorio kaltegarriei buruz ohartarazten. Hegoaldeko herrialdeak eta komunitate indigenak, alegia, ingurumenarekin lotura handiagoa dutenak, ari dira berehalako ondorioak jasaten. Hala ere, fenomeno horren ondorioak gizarteari modu nahasgarri eta geldiarazlean jakinarazi zaizkiola uste da, arriskuak gehiago azpimarratu direlako konponbideak baino, eta, ondorioz, alde batera utzi delako herritarrek ohiturak eta bizimoduak modu kolektiboan aldatuz konponbideak emateko duten gaitasuna. Horrek herritarren erantzun emozionala sustatu du, eta mehatxua ukatzetik erantzukizuna beste batzuei ematera iritsi gara. Beharrizan horren jakitun izanik, Biosortzailea programa proposatzen da. Ingurumenaren aldeko gizarte eraldaketarako sormen proiektu berritzailea da, alternatiba jasangarriak sortuko dituena, gazteen parte hartzea bultzatuko duena eta klima aldaketaren aurkako borrokarekin eta ingurumen osasungarria izateko giza eskubidearen defentsarekin lotutako politika publikoetan izango duen eragina sustatuko duena.