Eskubide laboralak betetzea sustatzea (El Salvador)

Proiektua San Salvador departamenduan kokatzen da, San Salvador herrian, gizarte mugimenduko erakundeekin, batez ere sindikatu, elkarte feminista eta LGBTI komunitateko erakundeekin.
El Salvadorren sistema kapitalista heteropatriarkalari lotutako egiturazko indarkeria arazo bat dago, eta horren ondorioz gizarte talde askok bazterketari eta beren bizi baldintzen eskasiari aurre egin behar izaten diete gizarte, kultura, politika, ekologia eta ekonomia mailan. Zentzu horretan, El Salvadorko langile jendeari gehien eragiten dion bazterketa motetako bat da lan merkatuarena, zeinak, aldi berean, gizarte mailako beste bazterketa edo ahultasun mota batzuk sortzen dituen. Gainera, langile taldearen barruan, emakume eta LGTBI kolektiboak dira bazterketa horren seinaleak maila gogorrenean bizi dituztenak.
Proiektuaren helburua da erakunde publikoen (nagusiki Laneko eta Gizarte Aurreikuspeneko Ministerioa) eta El Salvadorko gizarte mugimenduaren (sindikatuak, feministak, LGBTI) ahalmenak eta elkarlana indartzea, generoko eta sexu orientazioko arrazoiengatik diskriminatutako herritarren lan eskubideak benetan gauzatzea sustatzeko.