Donostiako Udalaren eta Euskadiko GGKEen Koordinakundea-Gipuzkoako Ordezkaritzaren arteko lankidetza-hitzarmena

Euskadiko GGKEen Koordinakundea ofizialki 1988an sortu zen; zehazki, Gipuzkoan, 1990ean hasi zen lanean, baina 2000. urtean jarri zen abian Idazkaritza Teknikoa deiturikoa, Donostiako Udalaren lankidetzari esker. Lankidetza hori pixkanaka sendotzen ari da, eta 2003. urteaz geroztik, lankidetza-hitzarmen bat dago Donostiako Udalaren eta Koordinakundearen Gipuzkoako Ordezkaritzaren artean. Era berean, 2006an lehen lankidetza-hitzarmena sinatu zen Gipuzkoako Foru Aldundiarekin. Bi hitzarmenek (baita EAEko gainerako 7 erakunde nagusiekin ere) indarrean jarraitzen dute gaur egun. 2025ko ekitaldi honetan, koordinakundeak 84 erakundez osatutako kolektibo bat ordezkatzen du. garapenerako gobernuz kanpoko euskal erakundeak (GGKE), 51 Gipuzkoako lurraldean ordezkaritza dutenak eta nazioarteko lankidetzan eta gizarte-eraldaketarako hezkuntzan lan egiten dutenak. Kalitatezko garapenerako lankidetza sustatzen dugu erakunde publiko eta pribatuetan, baita kide diren GGKEetan ere. Erakunde bazkideen prozesuei ere laguntzen diegu, eta haien gaitasun politikoak eta teknikoak indartzen ditugu, gizartea eraldatzen laguntzeko helburuarekin. Horretarako, elkartasun-kultura sustatzen dugu herritarrengan, pobrezia eta desberdintasunak sortzen dituen indarreko eredua zalantzan jarriko duena, eta kausei buruzko parte-hartzea eta eztabaida kritikoa errazten dugu. Garrantzitsutzat jotzen dugu demokrazia parte-hartzailea, independentzia, gardentasuna eta koherentzia sustatzea, hori guztia genero-berdintasunez egitearen balioa azpimarratuz, hori baita euskal lankidetzaren zutabe eta bereizgarri. Koordinakundearen helburu nagusia garapenerako lankidetzaren defentsa da, eta, horretarako, kide diren erakundeen artean irizpide komunak sortzeko topaketa-, eztabaida- eta hausnarketa-guneak ahalbidetzen ditu, politikan eta gizartean eragina izanez, beste gizarte-mugimendu batzuekin aliantzak eginez eta presentzia publiko esanguratsua izatea bilatuz. Hori guztia, erakundeak beren lanean eta gaitasunetan indartuz, haien arteko aliantzak erraztuz eta haien baliabideak kolektiboaren zerbitzura jarriz, eta alderantziz. Begi bistakoa dirudi garapen-arazo eta -erronkei ezin diegula bakarka aurre egin, eta bat egiteak eta sinergiak batzeak balio erantsia ematen dutela, koordinatuta, gizarte-erakundeak, indartsuagoak gara.

Elkartutako erakundeek baterako lanerako espazio bat bilatzen dute Koordinakundean, Jokabide Kode komun baten esparruan arautua. Kode horrek elkartutako GGKEen eta gure erakundearen lana gidatu behar duten printzipioak eta balioak jasotzen ditu, bai eta Barne Erregimeneko Erregelamendu bat ere, zeina hainbat hilabetetako lanaren ondoren aldatu baitzen eta Batzar Orokorrak onartu baitzuen 2019an. Oraindik ere erregelamendu horrek jasotzen dituen mekanismoak ezartzen ari gara, jardutean arduratsuak eta eredugarriak izateko. Kontrako testuinguru bat dugu, non elkartasuna gero eta kriminalizatuagoa dagoen, non gatazkak eta jarrerak gero eta gehiago erradikalizatzen eta polarizatzen diren, eta non ekintza kolektiboak, interes komunaren parte sentitzen diren eragile koordinatuen baturak, inoiz baino indar handiagoa hartzen duen.