Biodibertsitaterako leiho campusa (Vedi.bio campusa)-Mexiko

Erdialdeko Amerika maiako komunitate indigenetako gazteek, zehazki Yucatan, Chiapas eta Guatemalakoek, ingurumen aldetiko ahulezia edo kalteberatasun egoeran daudela, irtenbide sortzaile eta berritzaileak garatu behar dituzte ingurumena kaltetzearekin eta kultur identitate jatorrizkoen galerarekin lotutako arazo komunentzat. Horretarako VEDI.BIO campusa egitea planteatzen da, kultura indigena kalteberetako gazteen bi giza eskubide lotzen baititu: kultur diskriminaziorik jasan gabe parte hartzeko eta berritzeko eskubidea, eta ingurumen seguru eta osasungarri baterako eskubidea. Aurre egiteko estrategia berritzaile eta sortzaileak eragingo dira, ingurumeneko arazo sorta komunari irtenbidea emateko, abiapuntu harturik praktika biokultural endogenoak, berrinterpretatu eta egokitu egingo baitituzte tokiko bertako gazteek, erresilientzia handiagoko eta ahaldunduagoko komunitateak eratzea bultzatuz horrela.
Proiektuaren bitartez VEDI.BIO campusaren lehen edizio pilotu bat egin nahi da Yucatango Mérida hirian (10 egun), eskualdeko gazteekin, helburu harturik Gipuzkoako topaketan zehar (2017ko irailean egiteko da eta dagoeneko badu beste finantzaketa bat) diseinatutako bio-sorkuntzako ekimenak inplementatzea. Elkarrekin ikasteko eta sortzeko gunea izango da (Campusa). Erdialdeko Amerika aukeratzeko arrazoia inguru horretako kultur eta geografia aldetiko aniztasun handia da (goi ordokia, kostaldea, mendia, basoa…), horrek erraztu egiten baitu bio-sorkuntzako ekimenak inplementatzea. Eskualdeko erakunde komunitarioekin ezarritako lotura sendoak daude jada, eta baita UNAM ‘Centro en Humanidades y CC.SS’ (CEPHCIS-UNAM) deituaren laguntza ere.
Guatemala eta Yucatango VEDI komunitateko emakumezko 2 prestatzailek, Yucatan eta Guatemalako 25 gaztek, eta Yucatan, Chiapas eta Guatemalako komunitateetako 50 pertsonak hartuko dute parte, eta % 50 emakumeak izango direla jotzen da. Honako jarduera hauek izango dira:
1. Eragileen arteko koordinazioa edukietara begira, topaketaren deialdia, eta antolaketa eta parte hartuko duten gazteekiko koordinazioa.
2. Moduluak ematea, bio-sorkuntzako 3 ekimen diseinatzea bere prototipo eta guzti, eta horiek Yucatan, Chiapas eta Guatemalako hiru komunitatetan esperimentatzea.
3. Azken doikuntzak eta azalpen-materialak prestatzea, errepikagarriak izan daitezen, horiek komunitateei itzuliz eta on line.